தமிழில் பேசுங்கள்

          கடந்த 27/04/2010  அன்று செவ்வாய் கிழமை பொத்தோங் பசிர் MRT அருகில் உள்ள  சிவதுர்கா ஆலயம் சென்றிருந்தோம். அருள்மிகு சோமநாதர், அருள்மிகு துர்கையம்மன், அருள்மிகு விநாயகர், அருள்மிகு முருகன், அருள்மிகு தட்சணாமூர்த்தி, அருள்மிகு பிரம்மன், அருள்மிகு சுந்தரவள்ளி, அப்பர், சுந்தரர், மாணிக்கவாசகர் ஆகிய நாயன்மார்கள், பைரவர், நவக்கிரகங்கள் ஆகிய தெய்வங்களை வணங்கி பிரசாதம் பெற்றுக்கொண்டு கோயிலின் வலப்புறம் உள்ள அன்னதான இடத்தில் வந்து அமர்ந்தோம். அதுவரை தமிழில் பேசிக்கொண்டிருந்த தமிழ் பெண்மணிகள் எங்களைக் கண்டதும் ஆங்கிலத்தில் பேசிக்கொண்டனர். 

 

         எனக்கு அப்போதுதான் நினைவிற்கு வந்தது. சமீபத்தில் ஒலி 96.8 ல் "தமிழர் அனைவரும் தமிழரிடத்தில் தமிழில் பேசுங்களேன்" என்று கேட்டுக் கொண்டதை எவ்வளவு மதிக்கிறார்கள் என்று. 

குறள் - 4

அதிகாரம் - வழிபாடு 

குறள் - 4

வேண்டுதல்வேண்   டாமை இலானடி சேர்ந்தார்க்கு 

யாண்டும் இடும்பை இல. 

பொருள்: 

விருப்பு வெறுப்பற்றுத் தன்னலமின்றித் திகழ்கின்றவரை பின்பற்றி நடப்பவர்களுக்கு எப்போதுமே துன்பம் ஏற்படுவதில்லை. 

 

எளிதில் எவரையும் நம்பி விடாதீர்கள். நம்பிக்கைக்கு உரியவராகி விட்ட பின் நம்புங்கள், சந்தேகம் கொள்ளாதீர்கள். 

அபிஷேகம், அபிஷேகம்

            

(அருள்மிகு வில்லேந்திய வேலவர், சாயாவனம், பூம்புகார், தமிழ்நாடு)

              சமீபத்தில் முருகனைப் போற்றிப் பாடும் பாடல் ஒன்று கேட்கும் வாய்ப்பு பெற்றேன். அதில் முருகப் பெருமானுக்கு செய்யும் பலவகை அபிஷேகங்களால் கிடைக்கப்பெறும் பலன்களை பட்டியல் இட்டு உள்ளனர். அதன் வழி, எம்பெருமானுக்கு அபிஷேகங்கள் செய்து அன்பர்கள் உய்திட என்னால் இயன்ற இவ்வெளியீட்டைத் தருகிறேன். 

•  எள் நீர் - பிணி விலக்க  
• இளநீர் - யோகம் கிடைக்க  
• எலுமிச்சை - அச்சம் அகற்ற 
• மாங்கனிச்சாறு - வெற்றி பெற
• கரும்புச் சாறு - தேகக்கட்டு பெற 
• பால் - ஆயுள் பலம் பெற 
• தயிர் - நன்மக்கட்பேறு 
• நெய் - வீடுபேறு 
• கொம்புத்தேன் - தேன்  குரல் கிடைக்க 
• பஞ்சாமிர்தம் - செல்வம் குவிக்க 
• நறுமஞ்சனம் - கடன் தொலைக்க 
• சந்தனம் - புகழ் பெற 
• பன்னீர் - கல்விச்செல்வம் பெற 
• திருநீறு - மூவுலக நலம் பெற 
• சொக்கத் தங்க அலங்காரம் - பெரும் லாபம் பெற 

இதை வெளியிட்டே ஆகவேண்டும் என்று நினைத்திருந்தேன். இன்று அதற்குரிய வாய்ப்பு கிடைத்தது. பயன்படுத்திக் கொண்டேன்.

இந்த பாடலை பதிவிறக்கம் செய்ய கீழ்க் காணும் இணைப்பைக் கிளிக் செய்யுங்கள்.

ஒன்றல்ல ரெண்டுமல்ல ஆறுமுகம் கொண்டவா.mp3 

தைப்பூச காவடி காட்சிகள்(மொரிஷீயஸ்)

 கடந்த தைப்பூசத்தின் போது மொரிஷீயஸ் நாட்டில் முருக பக்தர்கள் மேற்கொண்ட காவடி பிரார்த்தனையின் போது எடுக்கப்பட்ட வீடியோ காட்சிகளை சமீபத்தில் காணும் வாய்ப்பு பெற்றேன். அதனை இந்த பிளாகில் இணைத்துள்ளேன். அன்பர்கள் கண்டு, முருகனின் அருள் கிடைக்கப் பெறுவீர்களாக.

வீடியோ 1

வீடியோ 2 

வீடியோ 3  

ஸ்ரீ மலைக்கோயில் முருகன் ஆலயம்

                  

               முருகன் என்றால் அழகு, அழகு என்றால் முருகன். முருகன் கலியுகத் தெய்வம். முருகன் மீது  கடவுள் எனும் நிலையையும் தாண்டி அவன்பால் அன்பு கொண்டோருக்கெல்லாம் அவன் தம் திருவிளையாடல்கள் அறிந்திருப்பர், உணர்வால் தெரிந்திருப்பர், தெளிந்திருப்பர். முருகனைப் போற்றி பலப் பல பெரியோர் , பல்வேறு கால கட்டங்களில் தமிழ் இலக்கியங்களில் பாடி வைத்துள்ளனர். தமிழ் என்றால் அனைவருக்கும் நினைவில் தோன்றும் ஒரு பெயர் முருகன் எனும் அழகு தெய்வமே. தம் அப்பனுக்கே பாடம் சொன்ன சுப்பன் அவன். ஆபத்து எப்போதெல்லாம் அடியவர் வாழ்வில் குறுக்கிடுகிறதோ, அப்போதெல்லாம் "முருகா" , என்று அழைப்போருக்கும், நினைப்போருக்கும் எந்த ஒரு ஆபத்தையும் வேரறுக்கும் அன்புத் தெய்வம்.

                 ஒன்றைக் குறிப்பிட்டுச் சொல்லவேண்டும். முருகனின் பக்தர்கள், அடியவர்கள் உலகெங்கும் உண்டு. இதை நான் சொல்லித்தான் தெரியவேண்டிய அவசியம் இல்லை என்பதும் எனக்கு தெரிந்த ஒன்றே. முருகன் மீது அனுதினமும் அன்பு கொண்டு விளங்கும் ஆன்றோர்கள், அடியவர்கள் உலகெங்கும் எம்பெருமானின் சிறப்பை வெளிகாட்டும் விதமாக தாம் வாழும் நாடுகளில் புதியதாகக் கோயில்கள் கட்டுவித்தும், ஏற்கனவே உள்ள கோயில்களின் பராமரிப்பை மேற்கொண்டும், தொன்மை நிறைந்த கோயில்களுக்கென பொருளுதவி செய்தும் தங்கள் அன்பை வெளிக்காட்டிக் கொண்டிருக்கிறார்கள். அந்த வகையில், மலேசியாவைச் சார்ந்த திரு.சேந்தன், திருமதி.வள்ளி தம்பதியர் உலகெங்கும் உள்ள முருகன் கோயில் கொண்டுள்ள ஆலயங்களுக்கு யாத்திரைகள் மேற்கொண்டு  அந்த ஆலயங்கள் பற்றிய புகைப்படங்கள், வரலாறு, முருகன் பற்றிய பாடல்கள், தமிழ்ப் பாடல்களின்  ஆங்கிலத்தில் மொழிபெயர்ப்புக்கள் என தங்களின் இணைய தளத்தில் மிக நீண்ட காலமாக வெளியிட்டு வருகின்றனர். முருகன் மீது அன்புகொண்டு வாழும் அனைவரும் பார்வையிட வேண்டிய ஒரு தளம் இது. 

www.kaumaram.com

            சிங்கப்பூரிலும் முருகனுக்கென்று பல ஆலயங்கள் உள்ளன. அதில் ஸ்ரீ தண்டாயுதபாணி ஆலயம், அருள்மிகு முருகன் ஆலயம், ஸ்ரீ மலைக்கோயில் முருகன் ஆலயங்கள் குறிப்பிடத்தக்கவை. அந்த வகையில் புகிட் பஞ்சாங் அருகில் திருக்குன்றத்தின் மீது ஆலயம் கொண்டிருக்கும் முருகனைத் தரிசிக்கும் பெரும்பேறு கிடைத்தது. இடப்பாகத்தில் தந்தை, தாயாரோடும், வலப்பக்கத்தில் சகோதரருடனும், வள்ளி தெய்வானை சமேதராக திருக்காட்சி தரும் முருகப்பெருமானை வணங்கி மகிழும் பெரும்பேறு பெற்றேன். அதுவரை, கடந்த பிப்ரவரி 14 நள்ளிரவு ஏற்பட்ட லாரி விபத்தில் எனது சகோதரனை (எனது அம்மாவின் சகோதரி மகன்) இழந்து, அதனால் ஏற்பட்ட சோகத்தை மறக்க இயலாமல், தினம் தினம் தவித்துக் கொண்டிருந்த வேளையில், முருகனின் ஆலயம் செல்லும் வாய்ப்பு பெற்றேன். அன்று முதல், என் மனதில் அழுந்தியிருந்த சோகம் ஒரு வழியாய் விடைபெற்றுப் போனது. இதெல்லாம் பிரமை என்று சொல்ல முயற்சிக்கும்  நாத்திக வாதிகளுக்கு  பதில் சொல்ல வேண்டிய அவசியமில்லை.

              குறிப்பிடத்தக்க விதமாக, சமய, இன நல்லிணக்கத்தை அனைவரும் பின்பற்றும்படியாக ஆலயத்தின் கீழ்பக்கமாக சீன மக்களின் தெய்வமும், புத்தர் சன்னதியும், மற்றும் பிள்ளையார், பக்த ஆஞ்சநேயர், ராகவேந்திரர், திருமலை பெருமாள், விஷ்ணு, அன்னபூரணி, துர்கை அம்மன், நர்த்தன விநாயகர், ஐயப்பன், அரச மரம் உடனான நாகலிங்கம், காளி அம்மன், முனீஸ்வரர், விநாயகர் சன்னதிகள் உள்ளன. ஸ்ரீ முருகன் ஆலயத்தின் தளத்தில் நவக்கிரக சன்னதியும் இடம் பெற்றுள்ளது.

தேக்காவில் இருந்து முருகன்  திருக்குன்றம் செல்ல விரும்பும்   பக்தர்கள் புகிட் திமா சாலையில் உள்ள (லிட்டில் இந்தியா MRT அருகில் உள்ள பேருந்து நிறுத்தத்தில் இருந்து பேருந்து எண். 67 , 170 ஆகிய பேருந்துகள் மூலம் சென்றடையலாம். ஆலயத்தின் மிக அருகிலேயே பேருந்து நிறுத்தம் உள்ளது. புதிதாக செல்வோர் புகிட் பஞ்சாங்  LRT வளைவை அடையாளமாகக் கொள்ளலாம்.

கோயில் செல்லும் வழி வரைபடம் 

கோயிலின் இணையதளம்  

முருகன் பாடல்கள்

குறள்: 3

அறத்துப்பால் 

அதிகாரம்: வழிபாடு  

" மலர்மிசை ஏகினான்  மாணடி சேர்ந்தார் 

நிலமிசை நீடுவாழ் வார்".

 

பொருள்: மலர் போன்ற மனத்தில் நிறைந்தவனைப் பின்பற்றுவோரின் புகழ் வாழ்வு, உலகில் நெடுங்காலம் நிலைத்து நிற்கும்.

MOM Guide

சிங்கப்பூரில் பணிபுரியும் வெளிநாட்டு ஊழியர்களுக்கான வழிகாட்டி நூல் (மார்ச் 2010 வரை) என  தமிழ் & ஹிந்தியில் மனிதவளத்துறை அமைச்சகத்தால் (Ministry of Manpower)  வெளிடப்பட்டுள்ளது. இந்த கையேடு சிங்கப்பூரில் பணிபுரியும் இந்தியர் அனைவருக்கும் துணைபுரியும் என்ற நம்பிக்கையில் வெளியிடுகிறேன். 

கையேட்டில் வெளியிடப்பட்டுள்ள தகவல்கள் எதுவும் மாறாமல் வெளியிடுகிறேன்.

சிங்கப்பூருக்கு உங்கள் வரவு நல்வரவாகுக 

பல்வேறு பண்பாடுகளும் மொழிகளும் கலக்கும் நாடான சிங்கப்பூருக்கு உங்கள் வரவு நல்வரவாகுக.

சிங்கப்பூருக்கு நீங்கள் வேலை செய்ய வருவது இதுவே முதல் முறை எனினும், அனைத்தும் பழக்கமற்றவை எனினும், கவலை வேண்டாம். இங்கு உங்கள் வேலைச் சூழலை மற்றும் வாழ்க்கைச் சூழலை எவ்வாறு ஏற்பது, அவற்றுடன் எவ்வாறு இசைந்து செல்வது என்பவை பற்றி இவ்வழிகாட்டி நூல் உங்களுக்குக்கான தகவல்களை அளிக்கும்.

இந்த வழிகாட்டி நூல் பற்றி 

நீங்கள் சிங்கப்பூரில் வேலை செய்யும் போது உங்கள் வேலை உரிமைகள் மற்றும் பொறுப்புகள் ஆகியவற்றைப் புரிந்துகொள்ள, தகவல்கள் நிறைந்த இவ்வழிகாட்டி நூல் உங்களுக்கு உதவி செய்யும். உதவிக்கான வழிகள், எடுத்துக்காட்டாக மனித வள அமைச்சு, காவல்துறை போன்றவற்றின் பயனுள்ள தொலைபேசி எண்களைப் பற்றிய முக்கியமான தகவல்களை, இவ்வழிகாட்டி நூலில் நீங்கள் காணலாம். 

சிங்கப்பூரில் வேலை செய்தல் 

சிங்கப்பூரில் வேலை செய்யும் எல்லா வெளிநாட்டவரும் செல்லுபடியாகும் வேலை அனுமதியை வைத்திருக்க வேண்டும்.வேலை அனுமதியுடன் இணைந்த பல்வேறு வேலை அனுமதி நிபந்தனைகளுக்கு நீங்கள் கீழ்படிந்து நடக்க வேண்டும். நீங்கள் இங்கு வேலை செய்யும் போது வேலை நிபந்தனைகள் மட்டுமில்லாமல் சிங்கப்பூர் சட்ட விதிகளையும் பின்பற்றி நடக்க வேண்டும். 

உள்ளூர் ஊழியர்களைப்  போன்றே, சிங்கப்பூரில் உள்ள எல்லா வெளிநாட்டு ஊழியர்களும் சிங்கப்பூரின் வேலைச் சட்டம் மற்றும் குற்றவியல் சட்ட விதிகளால் சமமாகப் பாதுகாக்கப்படுவர். வெளிநாட்டு ஊழியர்களை மோசமாக நடத்துகின்ற அல்லது தவறாகப் பயன்படுத்துகின்ற முதலாளிகள் தண்டிக்கப்படுவர். 

பயன்மிக்க வேலை அனுபவம் பெற்றிடுவீர் 

சிங்கப்பூரில் வேலை செய்வது மிகுந்த ஆதாயம் தரும் அனுபவமாக இருக்க முடியும். புதிய சூழலுடன் ஒத்து செல்வது துவக்கத்தில் உங்களுக்கு கடினமாக இருக்கலாம். திறந்த மனதுடன் நேர்மறையாக இருப்பது புதிய மாற்றங்களை எளிதாக ஏற்றுக்கொள்வதற்கு உதவி செய்யும். 

உங்கள் தாய்நாட்டைச் சேர்ந்த வெளிநாட்டு ஊழியர்கள் பலர் சிங்கப்பூரில் வேலை செய்வதை நீங்கள் காண்பீர்கள்: வேளையில் விரைந்து உங்களை ஈடுபடுத்திக் கொள்ள அவர்கள் உதவக் கூடும். வேலையிடத்தில் எதிர்கொள்ளும் பிரச்னைகள் பற்றி உடன் வேலை செய்பவர்களிடம் நீங்கள் அறிவுரை நாடலாம், அல்லது நீங்கள் இங்கு தங்கியிருப்பதை மேன்மையுடையதாக  ஆக்கும் வகையில் விடுமுறை நாட்களின் போது அவர்களுடன் கலந்து பழகலாம்.

வேலை அனுமதி நிபந்தனைகள் 

உங்களுக்கு வேலை அனுமதிச் சீட்டு அளிக்கப்பட்டுள்ளது. இப்போது நீங்கள் சட்டப்படி சிங்கப்பூரில் வேலை செய்யலாம். வேலை அனுமதிச் சீட்டு பெற்றவர் என்ற முறையில், இவ்வுரிமைகளில் கூறப்பட்டுள்ள நிபந்தனைகளுக்குக் கீழ்படிந்து நீங்கள் நடக்க வேண்டும். இந்த நிபந்தனைகள் பின்வருமாறு: 

(i)

• வேலை அனுமதிச் சீட்டில் குறிக்கப்பட்டுள்ள வேலை மற்றும் முதலாளியிடம் மட்டுமே நீங்கள் வேலை செய்ய முடியும். 
• வேறு எந்தத் தொழிலிலும் நீங்கள் ஈடுபடக் கூடாது: அல்லது உங்கள் சொந்தத் தொழில் துவங்கக் கூடாது. 

• வேலையைத் துவங்கும் போது உங்கள் முதலாளி அளித்த முகவரியில் மட்டுமே நீங்கள் தங்க அனுமதிக்கப்படுகிறீர்கள். உங்கள் முகவரியை மாற்றினால், உங்கள் முதலாளிக்கு அதைத் தெரிவிக்க வேண்டும்.
• சிங்கப்பூரில் பதிவு செயயப்பட்ட மருத்துவர் ஒருவரிடம் நீங்கள் மருத்துவப் பரிசோதனை செய்துகொள்ள வேண்டும். நீங்கள் வேலைக்குத் தகுதியற்றவர் என மருத்துவச் சான்றிதழ் அளிக்கப்பட்டால், உங்கள் வேலை அனுமதிச் சீட்டு ரத்து செய்யப்படும். 
• அசல் வேலை அனுமதிச் சீட்டை நீங்கள் எப்போதும் வைத்திருக்க வேண்டும்; அரசாங்க அதிகாரி யாரேனும் சோதனைக்காக கேட்டால் அதனைக் காட்ட வேண்டும். 

(ii) நடத்தை

• வேலை அனுமதி ஆணையாளரின் ஒப்புதல் இன்றி சிங்கப்பூர் குடியுரிமை பெற்றவரையோ நிரந்தரவாசியையோ சிங்கப்பூருக்கு உள்ளே அல்லது வெளியே நீங்கள் திருமணம் செய்துகொள்ள முடியாது. உங்கள் வேலை அனுமதி முடிந்த பின்னரும், நீக்கப்பட்ட அல்லது ரத்து செயயப்பட்ட பின்னரும்  கூட இது பொருந்தும். 
• நீங்கள் வேலை அனுமதி ஆணையாளரின் அனுமதியுடன் சிங்கப்பூர் குடியுரிமை பெற்றவரை அல்லது நிரந்தரவாசியை ஏற்கனவே திருமணம் செய்துகொண்டிருந்தால் ஒழிய சிங்ககப்பூரில் வேலை செய்யும்போது தாய்மை அடைவதோ அல்லது குழந்தை பெற்றுக்கொள்வதோ கூடாது. உங்கள் வேலை அனுமதி முடிந்த பின்னரும், நீக்கப்பட்ட அல்லது ரத்து செய்யப்பட்ட பின்னரும் கூட இது பொருந்தும். 

(தொடரும்)